Walang perfect crime

By Ellen Tordesillas

Ang nangyari kay Ruby Rose Barrameda Jimenez ay isang patunay na walang “perfect crime”.

Kahit gaano kagaling ang pagka-plano ng isang krimen, lalabas na lalabas ang katotohanan. Sa kaso ni Ruby Rose, dalawang taon bago lumabas ang katotohanan.

Si Ruby Rose, 27 taong gulang, ay biglang nawala noong March 14, 2007. Nang nawala siya, may kaso siyang isinampa sa kanyang asawa para makuha ang kanyang mga anak.

Ngayon, lumalabas ang katotohanan dahil kay Manuel Montero , dating kawani ng Buena Suerte Jimenez Fishing, ang negosyo ng mga Jimenez, na bumigay na sa kanyang konsyensa at nangumpisal na isa siya sa pumatay kay Ruby Rose.

Ayon kay Rochelle Barrameda, beauty queen at artista na kapatid ni Ruby Rose, na ang biyenan ni Ruby Rose na si Manuel Jimenez, at ang kapatid na si Lope Jimenez, ang nag-utos na dukutin at patayin si Ruby Rose. Sa loob daw ng BSJ warehouse pinatay si Ruby Rose ayon kay Montero.

Sianbi ni Lope sa TV na wala siayng kinalaman sa pagpatay kay Ruby Rose at magsasampa raw siya ng kaso laban kay Rochelle.

Mukhang totoo ang sinasabi ni Montero dahil naituro niya sa mga pulis kung saan ang bangkay ni Ruby Rose at nakuha na nga sa ilalim ng dagat bandang Navotas na nakalagay sa drum na sinemento. Kaya buo pa ang katawan at nakilala ng mga Barrameda na yun nga si Ruby Rose.

Sabi ni Chief Superintendent Roberto Rosales, hepe ng National Capital Region Police Office, na hindi pa kasali ang asawa ni Ruby Rose na si Manuel Jimenez III sa mga isinampahan ng kasong murder ngunit ini-imbistigahan pa ang maari niyang papel sa pangyayari..

Sinasabi ni Rochelle na hindi lang alitan mag-asawa (binubugbug daw si Ruby ng asawa) ang dahilan kung bakit pinatay si Ruby. Malaki daw ang posibilidad na may koneksyun ang mga “ilegal” na negosyo ng mga Jimenez.

Sinabi ng nanay ni Ruby Rose na si Asuncion, “May mga paihi sila sa gasolina. Sa pagkaka-alam ko ang fishing business ay front lang.”

“Paihi sa gasolina” ay smuggling ng gasolina. Nililipay ang gasolina mula sa tanker sa isang maliit na fishing vessel. Noong isang taon, ni-raid ng Bureau of Customs ang mga fishing vessels ng BSJ fishing dahil nga sa suspetsang smuggling at nakakuha ng mga gasolina na nagkakahalaga ng P150 milyon.

Sabi ni Rochelle may mga naikwento ang kanyang kapatid sa kanya tungkol sa mga gawain ng pamilya ng kanyang asawa. Isa doon ang pagpatay sa isang tabloid reporter na si Alberto Orsolino noong 2006 na dating empleyado ng mga Jimenez.

Binaril si Orsolino malapit sa kanyang bahay sa vahay. Ang pumatay na si Rommel Lirazan na nakakulong ngayon ay nagsabing ang nag-order daw ay sina Jimenez.

Kahindik-hindik ang krimen. Parang kuwentong Mafia.

Nugnit ito ay nagpapatunay lamang na hindi natutulog ang Diyos.

 

Popularity: 33% [?]