Hiling ni Cory: milagro para sa bayan

By Ellen Tordesillas

Talaga namang kahanga-hanga si Cory Aquino sa pagmamahal sa bayan.

Sabi ng isang pari na nag-alay ng misa para sa kanya, tinanong siya kung humihingi siya ng milagro para gumaling siya, sabi ng 76-taong gulang na dating presidente, “Hindi. Hinhingi ko ang milagro para sa bayan.”

Sabi ni Kris noong linggo sa “The Buzz” na hirap na hirap ang nanay niya sa sakit na colon cancer. Stage 4 na ang kanyang cancer sa colon ng ito ay nadiskubre. Kapag stage 4, malala na yan ngunit walang makapagsabi na ikay ay mamatay na. Diyos lamang ang makapag-sabi niyan.

Lahat-lahat tayo ay mamatay. Dumadaan lang tayo dito sa mundo. Magkakaiba lang tayo ng skedyul at ng paraan ng biyahe sa ating hantungan.

Ang mahalaga ay kung paano mo ginamit ang hirap na buhay na binigay ng Panginoon. Ginamit mo ba yun sa pansariki mong kapakanan at nagperwisyo sa ibang tao? O ginamit mo ba yun para naman makatulong sa mas mahirap sa ‘yo? Kahit anong linya ng iyong trabaho, ginamit mo ba yun para naman gumanda kahit kukunti itong mundo?

Sinasabi ko palagi na ang aking dinadalangin sa Panginoon ay huwag lang sana ako pahirapan bago ako kunin. Yung madali lang. Maliban kasi sa sakit, problema sa akin ang pera at wala akong panggastos.

Ngunit hindi naman tayo makapili. Sa Panginoon yan kung ano ang nakalaan sa atin. Kung katulad ng nangyayari kay Cory, may rason ang Panginoon bakit ganun.Hindi naman ibig sabihin porke naghihirap ka ay parusa ng Panginoon sa iyo.

May maganda akong natutunan kay Deedee Siytangco, ang taga-pagsalita ni Cory Aquino. Ang asaw ni Deedee at namatay rin sa sakit na kanser. Nakalimutan ko kung anong klaseng kanser ngunit naghirap talaga. May mga araw na hindi raw talaga kaya ng kanser. Yun ang sitwasyun na kapag pumanaw na siya, parang magpapasalamat ka dahil tapos na ang kanyang paghihirap.

Sabi ni Deedee, pinayuhan sila ng isang madre na mag-isip sila ng isang kawsa o tao na ialay ni Sonny ang kanyang sakripisyo at napili nila ang isang seminarista. Pwede din kasi ang ibang kamang-anak na may problema.

Sa ganitong paraan, kahit naghihirap ka, parang may kabuluhan ang iyong pagpasakit.

Sabi ng isang pari sabi raw ni Cory, “Ina-alay niya pa rin sa bayan.”

Talaga naman ang bigat ng problema ng ating bayan kaya siguro ang tindi ng pasakit ni Cory. Sana naman magiging makabuluhan.

 

Popularity: 100% [?]