Bantayan ang Ukay-ukay

By Ellen Tordesillas

Pinayagan na ulit ng pamahalaan ang donasyon ng mga lumang damit galing sa ibang bansa. Ito ay para mapadali ang tulong para sa mga biktima ng bagyong “Ondoy”. Walang taripa ngunit kailangan naka-address sa Department of Social Welfare and Development ( DSWD).

Kailangan kasi ma-inspeksyun ng husto ng DSWD at mapausukan (fumigate) dahil hindi naman alam kung anong bakterya ang nandyan sa mga lumang damit.

At gustong siguraduhin ng pamahalaan na hindi maabuso ang pagpasok dito ng mga lumang damit, katulad ng nangyari dati. Baka kasi ang bagsak niyan ay sa ukay-ukay ulit. Sa halip na ang ang mga nasalanta ng bagyo ang makinabang, ang mga mapagsamantalang tao ang magsasaya.

Dahil siguro sa walang tiwala ang mga tao sa pamahalaang Arroyo, marami ang umalma sa order ni Arroyo na idaan ang lahat na donasyun galing sa abroad sa DSWD. Ito ang sabi ni Arroyo noong Sept. 29: . “Hindi sisingilan ng buwis o kukumpiskahan ng Bureau of Customs ang mga donasyon ng pagkain at kagamitan mula sa ibang bayan, basta’t ito ay naka-assign sa DSWD,”

Sabi Fr. Benjamin E. Alforque, presidente ng National Alliance for Filipino Concerns na nakabase sa Amerika na gustong kontrolin ni Arroyo ang mga tulong galing sa ibang bansa at isisingit na naman ang sarili para pumamel sa pag-distribute ng mga ayuda.

Sabi ni Customs Commissioner Napoleon Morales, kanyang ideya ang idaan lahat sa DSWD ang donasyun galing sa abroad para maiwasan ang smuggling. Marami raw kasing mga taong gustong magsamantala.

Ma-aari naman daw ilagay ang pangalan ng tao o grupo na papadalhan. Kailangan lang naka-address sa DSWD. Para daw mapadali ang paglabas ng mga tulong galing sa ibang bansa, sabi ni Morales, nag-buo siya ng one-stop-shop na processing center sa pier at sa airport. Kasama ang DSWD, National Disaster Coordinating Council, Presidential Management Staff, Department of Finance, Department of Health, Department of Environment and Natural Resources and the Bureau of Food and Drugs, at iba pa.

Sa mga ayaw nitong sistema, mas mabuti siguro mag door-to-door delivery na lang. Aabutin lang nga ng isang buwan. Mas maganda rin siguro na pera ang ipadala .

Mag-ingat rin sa pagbigay ng cash na donasyon dahil nadiskubre na may isang nanloko at isinama ang kanyang personal na bank account sa listahan na mga account ng isang TV station para sa biktima ng Ondoy. Kung gusto nyo magbigay donate ng pera sa ABS-CBN or GMA-7 (dahil talaga namang kahanga-hanga ang kanilang ginagawang operasyon para sa mga biktima ni “Ondoy”) doon nyo kukunin ang numero sa pinapalabas nila sa TV screen.

Ingat lang.

 

Popularity: 15% [?]